काठमाडौं, ३० साउन :
चिकित्सा शिक्षा सरोकार सङ्घर्ष समितिले चिकित्सा शिक्षा ऐन परिमार्जनको माग गरेको छ ।ऐन परिमार्जनको माग गर्दै समितिले शनिबारदेखि काठमाडौँको माइतीघर मण्डला क्षेत्रमा धर्ना दिँदै आएको छ । यसैक्रममा आज पनि माइतीघर मण्डलामा चिकित्सा शिक्षा ऐन परिमार्जनको माग गर्दै पदाधिकारीहरूले धर्ना दिएका थिए ।
चिकित्सा शिक्षा सरोकार सङ्घर्ष समितिले दैनिक बिहान ९ बजेदेखि १२ बजेसम्म धर्ना दिँदै आइरहेको छ ।
सो समितिले प्राविधिक शिक्षा तथा व्यावसायिक तालिम परिषद् सिटिइभिटीको पुनः संरचना गर्नुपर्ने, स्तरोन्नति गर्न बाँकी रहेका संस्थाहरूको तत्काल भर्ना खोल्नुपर्ने, चिकित्सा शिक्षा आयोग र सिटिइभिटीका कारण बन्द भएका नर्सिङ कलेजहरूमा तत्काल भर्ना खोल्न र कलेज बन्द हुँदा रोजगारी खोसिएका पेशाकर्मी तथा कर्मचारीहरूको रोजगारीको ग्यारेन्टी गर्नुपर्ने लगायतका माग राखेर धर्ना दिँदै आएको फोरम फर हेल्थ एण्ड टेक्निकल साइन्सका केन्द्रीय सदस्य एवं द हिमाल इन्स्टिच्युट अफ हेल्थ एण्ड टेक्निकल साइन्स प्रा.लि. वीरगन्जका निर्देशक डा विनोदप्रसाद यादवले बताउनुभयो ।
