काठमाडौं, २९ मंसिर : काभा पुरुष भलिबल क्लब च्याम्पियनशिपकाे उपाधिका लागि हेल्प नेपाल स्पोर्ट्स क्लब र भारतको क्यालिकट हिरोजले खेल्ने भएका छन् । हिजो भएको सेमिफाइनलमा माल्दिभ्सको क्लब एचडीसीलाई ३–० को सोझो सेटमा हराउँदै हेल्प नेपालले भारतको क्यालिकट हिरोजसँगको फाइनल भेट पक्का गरेको हो ।
हेल्प नेपालले पहिलाे सेट २५-१६, दाेस्राे सेट २५-१८ र तेस्राे सेट २५-२१ ले जित्याे । त्यसअघि इरानको १८ वर्षमुनिको टोलीलाई ३–१ ले हराउँदै क्यालिकट च्याम्पियनशिपको फाइनलमा पुगेको थियो । इरानकाे युवा टाेलीले पहिलाे सेट २५–२१ ले जित्याे । क्यालिकट हिराेजले दाेस्राे सेट २५–२२, तेस्राे सेट २५–२० र चाैथाे सेट २६–२४ ले जित्याे । फाइनल खेल आज दिउँसो साढे ४ बजे त्रिपुरेश्वरमा रहेकाे राष्ट्रिय खेलकुद परिषद् (राखेप) को कभर्ड हलमा हुनेछ ।
