काठमाडौं, २३ पुस : प्रधानमन्त्री केपी शर्मा ओलीले साफ महिला फुटबल, एशियाली कराँते र कावा बिच भलिबलमा पदक जित्न सफल खेलाडी, ती खेलका प्रशिक्षक र व्यवस्थापकलाई पुरस्कार प्रदान गर्नुभएको छ । युवा तथा खेलकुद मन्त्रालयले आज प्रधानमन्त्री निवास बालुवाटारमा आयोजना गरेको कार्यक्रममा सरकारको गएकाे मङ्सिर २८ गतेको निर्णयबमोजिम खेलाडी, प्रशिक्षक र व्यवस्थापकलाई पुस्कार प्रदान गरिएको हो ।
प्रधानमन्त्री ओलीको नेतृत्व सरकार गठन भएपछि खेलाडी एवम् प्रशिक्षकलाई प्रदान गरिने पुरस्कारमा करकट्टीको व्यवस्था खारेज भएको छ । गएकाे कात्तिक १ देखि १४ गतेसम्म काठमाण्डाैमा भएको साफ महिला च्याम्पियनशिपमा पदक विजेता अमृता जैसी, मुख्य प्रशिक्षक राजेन्द्र तामाङ र व्यवस्थापक वृन्दा देवान तथा चीनको हाइजाओमा गएकाे असोज १ देखि ७ गतेसम्म भएको २०औं एशियाली कराँते च्याम्यियनशिपमा पदक विजेता एरिका गुरुङ, मुख्य प्रशिक्षक कुशल श्रेष्ठलाई प्रधानमन्त्रीले पुरस्कार प्रदान गर्नुभयो ।
यसैगरी उहाँले गएकाे साउन १७ देखि २० गतेसम्म भुटानको थिम्पुमा भएको कावा बीच महिला तथा पुरुष भलिबलका विजेता कमला पुन, मनिषकुमारी चौधरी, प्रशिक्षक रुपेशकुमार विष्टलाई पनि पुरस्कार प्रदान गर्नुभयो । खेलका माध्यमबाट देशको गरिमा अन्तर्राष्ट्रिय क्षेत्रमा वृद्धि गरेकामा खेलाडीहरूको सराहना गर्दै प्रधानमन्त्री ओलीले खेल जित्न सकिन्छ भन्ने उच्च मनोबल र अठोटका साथ प्रतिस्पर्धा गर्न सुझाव दिनुभयो । -रासस
