काठमाडौं, ११ माघ : विगत तीन दिन यता बढेको अत्याधिक चिसो र शीतलहरका कारण जनकपुरधामसहित मधेशको जनजीवन प्रभावित बनेको छ ।
गत सोमवारदेखि दिउँसोबाट घाम उदाएको भएपनि मंगलवारदेखि एकाएक चलेको चिसो हावा र गएराति शितको वर्षा भएपछि मधेशमा अत्याधिक चिसो महशुस गरिएको हो । विगत तीन दिनदेखि घाम उदाएको छैन । साथै शीतलहर र शितको वर्षा पनि भइरहेको छ ।
अत्याधिक चिसो र घाम अभावका कारण ग्रामिण जनजीवन ठप्प छ । दैनिक ज्याला, मजदुरी गर्नेहरु मारमा परेका छन् । मधेशको जनजीवन १० बजे बिहानसम्म ठप्प हुने गरेको छ । चिसोबाट गरिव विपन्नहरुलाई धेरै समस्या भएको छ ।
स्थानीय आगो तापेर तथा ग्रामीण भेगमा पराल बालेर चिसो छल्ने गरेका छन् । जनकपुरधाममा शुक्रवार न्युनतम ११ र अधिकतम २१ डिग्री तापक्रम मापन गरिएको छ । जारी शीतलहर र चिसो हावा अझै केही दिनसम्म रहने अनुमान गरिएको छ ।
