काठमाडौं, ७ चैत्र :
हङकङ सरकारले आगामी अप्रिल महिनाबाट नेपालसहित ९ मुलुकमाथिको उडान प्रतिबन्ध हटाउने घोषणा गरेकाे छ । कोरोना संक्रमणका कारण बन्द गरिएको हङकङको आकाश ९ वटा मुलुकका लागि खुला गर्न लागिएको हो ।
उडान प्रतिबन्ध हटाउने निर्णय गरिएका देशहरुमा नेपाल पनि परेको छ । हङकङ सरकारकी प्रमुख क्यारी लामले आज (साेमबार)आगामी अप्रिल १ बाट नेपालसहित ९ मुलुकमाथिको उडान प्रतिबन्ध हटाउने घोषणा गर्नुभएको हो ।
प्रतिबन्ध हट्ने देशहरुमा नेपाल, अष्ट्रेलिया, क्यानडा, भारत, पाकिस्तान, फिलिपिन्स, बेलायत र अमेरिका रहेका छन् । त्यस्तै, हङकङ प्रवेश गर्ने विदेशीहरुका लागि क्वारेन्टिनको अवधि पनि ७ दिनमा छोट्याइने भएको छ । हङकङ सरकारकी प्रमुख क्यारी लामले अप्रिल २१ देखि भने भौतिक दूरीका नियमलाई पनि खुकुलो बनाईने घोषणा गर्नुभएको छ ।
संक्रमणको गति सुस्ताएको र अब विष्फोटक रुपमा संक्रमण फैलिने संभावना न्यून देखिएको भन्दै हङकङले प्रतिबन्धहरु खुकुलो गर्न लागेको हो ।
