काठमाडौं, १८ मंसिर :
चुनावको अन्तिम नतिजा आउन बाँकी रहेका बेला नयाँ सरकार गठन र चुनावको समीक्षाबारे छलफल गर्न सोमबार सत्ता गठबन्धनको बैठक बस्ने भएको छ । सत्ता गठबन्धनको स्पष्ट बहुमत आउने सम्भावना कम रहेको छ ।
स्पष्ट बहुमत पनि नआउने तर गठबन्धन नै अगाडि देखिएको चुनावी परिणामपछि बस्न लागेको यो बैठकमा नयाँ सरकारबारे छलफल हुनेछ । माओवादी केन्द्रका महासचिव देव गुरुङले आफ्नो पार्टीको बैठकपछि सञ्चारकर्मीहरूसँग कुरा गर्दै सोमबार सत्ता गठबन्धनको बैठक बस्ने जानकारी दिएका थिए । यो चुनावबाट सबैभन्दा ठूलो दल बनेको नेपाली कांग्रेसले नयाँ सरकरबारे कस्तो प्रस्ताव ल्याउँछ त्यसैअनुसार माओवादीले आफ्नो रणनीति बनाउने तयारी गरेको छ ।
यसअघि शनिबार सत्ता समीकरणका लागि सबै विकल्प खुदा राख्ने निर्णय गरेको माओवादी केन्द्रले आइतबार भने सत्ता गठबन्धनलाई निरन्तरता दिने निर्णय गरेको थियो । यो चुनावबाट सबैभन्दा ठूलो दल बनेको कांग्रेसले राजनीतिक भेटघाटलाई तीव्रता दिएको छ । प्रधानमन्त्री तथा कांग्रेस सभापति शेरबहादुर देउवा, उपसभापति पूर्णबहादुर खड्कालगायतका नेताहरूले राजनीतिक भेटघाट गरिरहेका छन् ।
