भरतपुर,१५ असाेज :
हाल अमेरिकामा बसोबास गर्दै आउनुभएका आदर्श मा.वि. दिव्यनगरका पूर्व विद्यार्थी मूक्ति दवाडीले ‘आदर्श शुभ जन्मोत्सव’ अक्षयकोष स्थापना गरी १ लाख ५० हजार रुपैँया सहयोग गर्नु भएको छ ।
शनिबार बिहान भर्चुअल माध्यमद्वारा आयोजित एक कार्यक्रममा उहाँले सो रकम उपलब्ध गराउने घोषणा गर्नुभएको हो । दवाडीले यस अघि १ लाख रुपैंयाबाट अक्षयकोषको सुरुवात गर्नुभएकोमा शनिबार आफ्नो जन्मदिनको अवसरमा ५० हजार थप गर्नुभएको हो ।
उक्त अवसरमा विद्यालयका प्रधानाध्यापक मित्रबन्धु चापागाईंले अक्षयकोषका संस्थापक दवाडीलाई धन्यवाद ज्ञापन गर्दै दवाडीले विगतमा गरेको सहयोग पनि स्मरण गर्नुभयो ।
अक्षयकोष मार्फत प्राप्त रकम विद्यालयका गरिब, विपन्न र जेहेन्दार विद्यार्थीहरुका निम्ति उपयोग गरिने जनाइएको छ ।
