काठमाडौं, ७ साउन :
मनसुनको मध्य समयमै न्यूनचापीय रेखा सरदर स्थानभन्दा दक्षिणतिर रहँदा नेपालमा वर्षा कम भइरहेको छ ।
न्यूनचापीय रेखा सरदर स्थानभन्दा दक्षिणतर्फ रहँदा नेपालभन्दा केही टाढा पर्ने भएकोले यहाँ वर्षा कम भइरहेको मौसम पूर्वानुमान् महाशाखाका मौसमविद् रोजन लामिछानेले जानकारी दिनुभयो ।
अहिले नेपालमा मनसुनको आंशिक प्रभाव मात्र परेको उहाँले बताउनुभयो ।
मनसुनको आंशिक प्रभाव मात्र रहेकाले विशेष गरी नेपालको तराई क्षेत्रमा उल्लेख्य वर्षा नभएको उहाँको भनाइ छ ।
मनसुनको न्यूनचापीय रेखा दक्षिणतर्फ सरेकोले भारत र बंगलादेशमा भने वर्षा बढी भइरहेको छ ।
अहिलेको अवस्थालाई मनसुन ब्रेकको अवस्था नै भन्न नमिले पनि पानी कम पर्ने मौसमविद् लामिछानेले बताउनुभयो ।
आउँदो तीन दिन सम्म नै न्यूनचापीय रेखा उत्तरतिर सर्ने सम्भावना कम रहेकोले यो अवस्था लम्बिन सक्ने उहाँले बताउनुभयो ।
मौसमविद्हरुले मनसुनको शुरुमै साउनको पहिलो हप्ता पानी कम पर्न सक्ने पूर्वानुमान् गरेका थिए ।
मौसम पूर्वानुमान् महाशाखाका अनुसार आज देशभर आंशिक देखि सामान्य बदली रहेर बाग्मती, गण्डकी, कर्णाली र सुदूरपश्चिम प्रदेशका केही ठाउँमा सामान्य पानी पर्ने संभावना रहेको छ ।
आज राति पनि देशभर आंशिक देखि सामान्य बदली भएर कोशी प्रदेश, बाग्मती प्रदेश र गण्डकी प्रदेशका पहाडी भू–भागका थोरै ठाउँमा पानी पर्ने सम्भावना रहेको मौसम पूर्वानुमान् महाशाखाले जनाएको छ ।
