भरतपुर, २८ जेठ ।
कोरोना भाईरसको मुख्य संक्रमण थलो बन्दै जान थालेपछि चितवनमा लकडाउनमा थप कडाई गरिएको छ । हिजो मंगलबारदेखि नै कडाई गरिएकोमा आज पनि थप सुरक्षा सतर्कता अपनाईएको हो । बिहानैदेखि जिल्लाका मुख्य मुख्य क्षेत्रमा प्रहरीको बाक्लो उपस्थिती देखिएको छ ।
यता भरतपुरमा अन्य दिनको तुलनामा मर्निङ वाकमा निस्कने सर्बसाधारणको सङ्ख्यामा समेत निकै कमी आएको देखिएको छ । मासु पसल, दुध डेरी लगायतका दोकानहरु पनि तुलनात्मक रुपमा कम खुलेका छन् ।
सोमबार चितवनमा एकैदिन ३० जनामा कोरोना संक्रमण देखिएपछि जिल्लाबासी बढी सतर्क देखिएका छन् । भरतपुर महानगरको वडा नम्बर ११ का दुईजनामा संक्रमण देखिएकोमा मंगलबार एकको निधन भएपछि अवस्था असामान्य बनेको छ ।
प्रमुख जिल्ला अधिकारी नारायण प्रसाद भट्टराईले संक्रमितको संख्या एकैपटक धेरै संख्यामा वृद्धि भएकाले कडाई गरिएको बताउनु भयो ।
