काठमाडौं, २३ जेष्ठ : चितवनका दुग्ध उत्पादक किसानले गएको कात्तिकदेखि दूधको भुक्तानी नपाएको गुनासो गरेका छन् । उनीहरूले ७० करोड रुपैयाँभन्दा बढी बक्यौता रहेको बताएका छन् । जिल्ला दुग्ध उत्पादक सहकारी सङ्घका अध्यक्ष किशोर वगालेकाअनुसार ४० हजार किसानको भुक्तानी रोकिएको छ ।
एक सय १४ वटा दुग्ध उत्पादक सहकारीमार्फत सङ्कलन गरिएको दूध खरिद गरेका डेरी उद्योगले भुक्तानी नदिएका हुन् । सुजल डेरी पोखराले कात्तिकको भुक्तानी गर्न बाँकी छ । दुग्ध विकास संस्थानको मङ्सिरयताको २२ करोड रुपैयाँ बाँकी छ भने अन्य २८ वटा डेरी उद्योगले पनि किसानलाई पैसा दिएका छैनन् ।
चितवनमा दैनिक तीन लाख ५० हजार लिटर दूध उत्पादन हुने गरेकामा एक लाख ५० हजार लिटर जिल्लाबाहिर जाने गरेको छ । रासस
